Kum zeizat ka si ti cu
ka rak fianglo nain nungak len ka rak i otkaa hrawng asi in ka thei. Zarhpi ni
zanlei cu kan chungkhar deuh in le hawile kom deuh an inn tete ah ka va leng
hna. Zarhpini cu sikaw. Zan pumh khi mino nih caan rak hman a si caah pumhnak
lei cu hawikom rual he hmunkhat ah kan i thawhṭi ṭhan hna. Cu zan cu ka lungah
a rak chuak ngai mi cu ka mit nih a hmuhmi paoh hna khi ka mitthlam ah an
dihlak in an lo kho lo, thinlung in ngaihnak le dawtnak timite nih pehtlaihnak (connection)
a tuah lengmang hna.
A thaizing cawnnikhatni
zing cu kan khua mino tlangrian ṭuan a si. Mino fund caah Nu he Pa he thingput
dingah an i thawh cio. Kan inn hi parual unau kan umnak asi caah hawikom tete
hi an kal um pah in an rak lutchuak pah tawn caah, cu zing zong cu hawikom
tampi nih an rak kan lutchuah hnawh pah. Ka thil cu ka nule pa nih an vun ka
timhpiak mi ka hawile pawl nih an vun hmuh tikah an khuaruah a har i, kei zong
ka si ve. Ka kaltak tak ko lai timi khi ka lungthin chungah a um hrim lo. Ka
mang hlah maw a si ti awk in khin ka buai taktak.
Mi cheukhat ka hawile
kom pawl cu an inn lei ah an kir hna. An nule pa an va chim hna. Kut an vun ka
tlaih pah khin lampi na thabat caan ah na din awk ti’n Lai artite cu an rak ka
put pah. Kan inn cu lampawngte cu sikaw. Ka kalle ka um a theih he theilo he
khat lak in lampi ah an dir i, ka kut cu an vun ka tlaih hlauhmah ko. A thlite
khin ka thinlung chunglei in i sum khawh lomi hawi le kom hna ṭhensianlonak mitthlite
cu duhsah tein a rak chuak hluahmah. Pasal!!! Ka rak hngakchia tuk rih caah
ahlei in ka nule pa ka hmu hna ahkhin ka ngai tuk colh hna.
Ka upa nih a rak ka
thlah. Lampi ah ka kal kho bak lo. Ka thil a ka phorh piak dih cu bu zong cu ka
u cu ka dawi kho hrim lo. Cu tluk cun ka nule pale hawikom ṭhirual pawl ka ṭhen
sian khawh lonak hna a tak in ka hun i hngali, ka lung a hung i fiang. Damte in
atu ka umnak ka phanh hnu zongah kaan philh kho hna lo. Hika ka um chungah a
cheukhat hawikom le cingla cheukhat nih hi vawlei nunnak in mual an ka liamtak
ti thawng ka theih hna. Atu tikah hin kan khuate va phan ṭhan ning law minung ka
hmuh dingmi pawl hna an mui tete lawng si loin an taksa zong cheukhat cu an i
dang tuk cang lai caah keimah caah cun ka mang bantuk a si than hoi lai.
Hi vawlei hi a tak a
rak um ruah lo. A zei poah an hun chuak i an lo ṭhan dih lengmang ko. Mino zong
kan no peng kho lo. Ka mang bantuk in ka ruahmi vawlei ahhin ka duh a tling kho
hrimhrim lo. Minung nih khuakhanmi nakin Bawipa nih khuakhanmi cu a let thong
in a ṭha deuh tiin an rak kan cawnpiak lengmang. Keimah bantuk in harnak le
sifahnak karlak ah caan saupi a pil cangmi ka nun hi zanmang bantuk in ka
ruahmi va si hna sehlaw zeitluk in khi da.
Pehṭhante ding!!
No comments:
Post a Comment